Ikasle maitea II

Ikasle maitea, entzun al duzu inoiz Gangsta´s Paradise (Coolio, LV) abestia? Kalean atzetik jarraitzen nauen melodietako bat da. Mentes peligrosas pelikulan agertzen delako agian, eskolara sartu baino lehen askotan entzuten dut. Irakasle baten bizitzarekin nahasten diren horrelako rap doinuek bazkalosteko logurea kentzen didatela aitortu behar dizut. Nolabait zurekin elkartu baino lehen nire tokian jartzen laguntzen naute. Eta Mentes peligrosas bezalako pelikuletako irakasleak miresten hasita, nik filme honetan agertzen den irakasletik eduki nahiko nuke pixka bat. Poesiak indartsu egiten gaituela sinisten duen irakasle hauskor eta sentiberetik.  Biolentziak indarra duen tokian artearen behar larrian pentsatuko duen andereak nire lilura pizten du. Bai, ondo asmatu duzu. Maite dut irakasleak agertzen diren pelikulak ikustea.

La lengua de las mariposas filma. Ikusi al duzu, ikasle maitea? Bertan agertzen den maisuak ikasle batengan pizten duen jakin-mina esnatu nahiko nuke zugan. Filmak arnasten duen sentsibilitate amaigabean eta naturaren presentzian pentsatzen ari naiz. Horiek merezi dituzula. Bai, ikasle maitea. Egun batean La profesora de parvulario pelikula ikusiko duzu edo En la casa filma. Eta bertan kontatzen zaizkigun istorioetan bezala, zure talentuak garaiz atzematea espero dut. Nire ametsa da Precious pelikulako protagonistak duen duintasunaren nolabaiteko konplize izatea. Bai, idazketaren indarrarekin zure indar hori topa dezazun nahiko nuke. Eta nola ez, ikasle maitea. El club de los poetas muertos pelikula. Bertan erakusten zaigu hezkuntzari helduta doala pasioa. Eta nik hitz handi hori zuk maitatzea maiteko nuke. Zure kabuz pentsatzeko gai izatea.

Ni uno menos  filma. Nola ez nau konkistatuko testuinguru txiro batean ikasle bakar bategatik edozer egiteko gai den andereño txinatarrak? Gauzen berezko balioaz hitz egiten diguna? Eta Esta tierra es mía pelikula, ikasle maitea. Egun batean ikusi behar duzu pelikula hori. Liburuak erreko dizkidate baina nigan dauden liburuak inoiz ez. Filmean agertzen diren horrelako esaldien irmotasunak barrena hartzen dit. Hori kutsatu nahiko nizuke. Eta Hoy empieza todo pelikula, ikasle maitea? Ez al dizu izenburu horrek dena esaten? Jakin ezazu betirako. Hezkuntzak irekiko dizkizu munduko ateak. Bizitzakoak. Eta Ser y tener filman enbidia pizten didan pazientzia ikusten dut maisu batengan. Mundu azeleratu honen erritmoa gelditzen dakien irakasle hori nahi dut izan zuretzat. Benetako denbora zuri eskeiniko dizuna.  

Ez da erraza, ikasle maitea, sinetsi iezadazu. Ez da erraza Los chicos del coro pelikulako gozotasuna egunero izatea. Baina nik filme horretako baikortasuna jan eta edan dezazun nahi dut ikasgelan. Musikarekin adierazi dezagun hitzekin ezin duguna. Zure ahots propioa izango duzu, ikasle maitea. Hori da nire desioa. Munduak irentsiko zaituen arren zuk mundua jateko grinaz esnatzea nahi dut egunero. Ez zaitzala El milagro de Anna Sullivan pelikulan bezala ezerk geldiarazi. Bizitza zirrikitu txikienetik ere azaleratuko da, ikasle maitea. Eta El indomable Will Hunting filmak bizitzak gailur intelektual handienak baino garrantzi ikaragarriagoa duela erakutsiko dizu. La profesora de Historia edo Diarios de la calle pelikuletan, berriz, zuretzat esanguratsua dena bakarrik ikasiko duzula konturatuko zara. Asperdura eskolatik kanpo, mesedez! Educando a Rita pelikulako emakumea hartu dezakezu eredutzat, ikasle maitea. Ezkondu eta haurrak izan baino lehen nire burua aurkitu nahi dut, esaten du Ritak filman. Zure burua aurkitzea. Ez al da zoragarria? Baina pelikula guztiak amaierara iristen dira eta Adios Mr. Chips pelikularekin, adio esateko momentua iritsi da. Bere bokazioarekin bizitzak ematen dituen tristurak ezabatzen zituen irakaslearekin. Egin ezazu zure bizitzarekin pelikula eder bat, ikasle maitea. Emozionatuko zaituen istorio bat. Zure bizitzan “The End” marrazten den arte. 

Irudia: José Luis Cuerdaren  La lengua de las mariposas filmeko eszena.